Joravarsinh Jadav

Si Joravarsinh Danubhai Jadav (ipinanganak noong Enero 10, 1940) ay isang Indian folklorista at tagapagtaguyod ng sining-pambayan mula sa Gujarat. Nalantad sa katutubong kultura bilang isang bata, nag-aral siya ng kasaysayan at kultura sa Ahmedabad. Siya ay nagsulat at namatnugot ng higit sa 90 mga gawa sa katutubong-kultura, katutubong-pampanitikan, at katutubong-pansining. Itinatag niya ang Pundasyong Gujarat Lok Kala para sa pagtataguyod ng katutubong sining. Siya ay ginawaran ng Padma Shri noong 2019.

Maagang buhay

Si Jadav ay isinilang noong Enero 10, 1940 sa pamayanang Akru malapit sa Dhandhuka (ngayon ay nasa distrito ng Ahmedabad, Gujarat) sa isang pamilyang magsasaka ng Rajput. Ang kaniyang mga magulang ay sina Danubhai Halubhai Jadav at Pamba. Pangalawa siya sa anim na magkakapatid. Siya ay pinalaki ng kanyang madrasta, si Gangaba.

Siya ay nalantad sa katutubong panitikan at katutubong sining noong bata pa siya dahil sa kaniyang pamumuhay sa isang kanayunan. Natanggap niya ang kaniyang edukasyon sa elementarya sa kaniyang nayon at sa Sheth Hasanali High School sa Dholka. Natanggap niya ang kaniyang edukasyon sa sekondaryang paaralan mula sa Gujarat Vidyapith noong 1956–57. Noong 1961, natapos niya ang kanyang degree sa batsilyer sa sining sa wikang Gujarati at Kasaysayan sa St. Xavier's College, Ahmedabad.

Natagpuan ni Jadav ang mga labi ng isang Huling Harappan na pook sa isang punso malapit sa lawa ng Khalavi malapit sa kaniyang katutubong nayon ng Akru. Napukaw nito ang kaniyang interes sa arkeolohiya at kasaysayan, at natapos niya ang kaniyang master ng sining sa Sinaunang Kulturang Indiyano sa Surian ng Pag-aaral at Pananaliksik ng Bholabhai Jeshingbhai, Ahmedabad, noong 1963. Ang kaniyang mga interes sa katutubong panitikan, katutubong kultura, at ang mga sining ng bayan ay lalong umunlad sa mga taong ito.

Matapos makompleto ang kanyang degree sa masteral, naging guro siya ng Gujarati sa Panchsheel High School sa Saraspur, Ahmedabad. Umalis siya at pumasok sa St. Xavier's College bilang part-time na lecturer. Noong 1964, sumali siya sa lingguhang Sahkar na inilathala ng Gujarat State Co-operative Union bilang opisyal ng publikasyon. Kalaunan ay iniangat siya sa posisyon ng punong ehekutibong opisyal noong 1994 at nagsilbi doon hanggang sa kanyang pagreretiro noong 1998. Siya rin ay namatnugot at naglathala ng buwanang Gramswaraj at in-edit ang buwanang Jinmangal.

Pinasikat ni Jadav ang sining-pambayan at tinangkilik ang mga katutubong artista sa pamamagitan ng pagpapatampok nito sa iba't ibang mass media site, kabilang ang telebisyon at radyo. Noong 1978, itinatag niya ang Gujarat Lok Kala Foundation para sa pagsulong ng katutubong sining at upang bigyan ang mga katutubong artista mula sa Gujarat at Rajasthan ng mas malawak na pagkakalantad at trabaho. Nagbigay ang Foundation ng plataporma para sa mga katutubong artista sa pambansa at pandaigdigang na antas.