Karaniwang taon
Ang isang karaniwang taon ay isang taon ng kalendaryo na may 365 araw, na naiiba sa isang taong bisyesto, na mayroong 366 na araw.[1] Mas pangkalahatan, walang embolismo (o pagpasok ng araw ng bisyesto sa taon ng kalendaryo) ang isang karaniwang taon. Gumagamit ang kalendaryong Gregoryano (tulad ng naunang kalendaryong Huliyano) ng mga karaniwang taon at taong bisyesto upang panatilihing nakahanay ang kalendaryo sa taong tropikal, na hindi naglalaman ng eksaktong bilang ng mga araw. Ang karaniwang taon ay humigit-kumulang isang sangkapat na araw na mas maikli kaysa sa isang taong tropikal, na mayroong 365.24 na araw.[2]
Ang karaniwang taon na may 365 araw ay may 52 linggo at isang araw, kaya ang isang karaniwang taon ay palaging nagsisimula at nagtatapos sa parehong araw ng linggo (halimbawa, sasapit ang Enero 1 at Disyembre 31 sa isang Miyerkules sa 2025) at magsisimula ang taon kasunod ng isang karaniwang taon sa kasunod na araw ng linggo.[3] Sa karaniwang mga taon, may eksaktong apat na linggo ang Pebrero,[4][5] kaya magsisimula ang Marso sa parehong araw ng linggo. Nagsisimula din ang Nobyembre sa araw na ito. Halimbawa, magsisimula ang Pebrero 2025 sa isang Sabado, kaya magsisimula din ang Marso sa isang Sabado. Susunod ang Nobyembre sa parehong katangian.
Ang bawat karaniwang taon ay may 179 nakanumerong tukol (even-numbered) na araw at 186 nakanumerong gansal (odd-numbered) na araw.
Sa kalendaryong Gregoryano, 303 sa bawat 400 taon ay karaniwang taon. Sa paghahambing, sa kalendaryong Huliyano, 300 sa bawat 400 taon ay karaniwang taon, at sa binagong kalendaryong Huliyano (ginamit ng Gresya) 682 sa bawat 900 taon ay karaniwang taon.
Mga sanggunian
baguhin- ↑ "Year | Calendar, Astronomy & Timekeeping | Britannica". www.britannica.com (sa wikang Ingles). Nakuha noong 2025-01-27.
- ↑ "Leap Day on February 29". www.timeanddate.com (sa wikang Ingles). Nakuha noong 2025-01-27.
- ↑ Lardner, Dionysius (1855). The Museum of Science and Art (sa wikang Ingles). Walton and Maberly. p. 23.
- ↑ "Weeks in a year". www.math.net (sa wikang Ingles). Nakuha noong 2025-01-28.
- ↑ Kramer, Michael S. (2023-12-28). Believe It or Not: The History, Culture, and Science Behind Health Beliefs and Practices (sa wikang Ingles). Springer Nature. p. 195. ISBN 978-3-031-46022-7.