Bilogo, Lungsod ng Batangas

Barangay ng Lungsod ng Batangas
(Idinirekta mula sa Bilogo (Batangas))

Isa ang Bilogo (opisyal na Barangay Bilogo o Brgy. Bilogo) sa 105 barangay na bumubuo sa Lungsod ng Batangas, Pilipinas.[3] Ito'y isang pamayanang rural na matatagpuan sa silangan ng lungsod at may layong 20 minuto mula sa Poblacion.[4] Nahahati sa pitong purok ang Brgy. Bilogo at mayroon itong tatlong sitio: Bagong Pook, Callejon o Ilaya, at Santolan.[2]

Barangay Bilogo
Isang kalsadang papasok sa Brgy. Bilogo
Isang kalsadang papasok sa Brgy. Bilogo
Opisyal na sagisag ng Barangay Bilogo
Sagisag
Lokasyon ng Brgy. Bilogo sa Lungsod ng Batangas
Lokasyon ng Brgy. Bilogo sa
Lungsod ng Batangas
Bansa:Pilipinas
Lalawigan:Batangas
Lungsod:Lungsod ng Batangas
Pamahalaan
 • Punong Barangay:Zyril B. Manalo
 • Mga Konsehal ng Barangay:
 • Tagapangulo ng Sangguniang Kabataan (SK)Philippe Adriel A. Perez
 • Mga Konsehal ng SK
Lawak
 • Kabuuan3.5 km2 (1.4 milya kuwadrado)
Populasyon
 (2015)[2]
 • Kabuuan2,011

Etimolohiya baguhin

Ayon sa isang lumang alamat, nagmula ang Bilogo sa bayugo, ang salitang Tagalog para sa "bunga ng puno ng gugo" na dati'y sagana sa pamayanan. Nang lumaon, ang bayugo ay naging biyugo hanggang sa huli'y tinawag na itong Bilogo.[5]

Kasaysayan baguhin

Mula pa noong 1870 ay isa na ang Bilogo sa pinakamatatandang barangay ng Lungsod ng Batangas.[6] Pag-aari ang Brgy. Bilogo ng isang mayamang opisyal na Espanyol na nakapangasawa ng isa sa mga katutubong naninirahan dito. Marami pang nangyari na pag-aasawahan ng mga dayuhan at lokal na residente at ang populasyon ay unti-unting lumaki. Makalipas ang ilang taon, ang Bilogo ay naging isang sitio at isinama ito sa Sitio Maapas; mula noon ay nakilala itong Bilogo Maapas. Kalaunan, humiwalay sa isa't isa ang Bilogo at Maapas at naging mga nagsasariling barangay.[5]

Isa si Quintin Manalo sa mga kauna-unahang teniente del barrio na naglingkod bilang pinuno ng Brgy. Bilogo. Nahalal naman sa mga sumunod pang eleksyon ang mga sumusunod: Fortunato Sulit, Jose Manalo, Miguel Ebe, Exequiel Perez, Victor Castillo, Miguel Chavez, Felix Sulit, Juan Perez, at Dionisio Panganiban. Noong Ikalawang Digmaang Pandaigdig, sinunog ng mga sundalong Hapon ang mga bahay nina Eleuterio Canent, Hilarion Lontoc, Pedro Ramos, at Francisco Rosales dahil sa pag-aakalang pinaslang sa Brgy. Bilogo ang isa sa kanilang mga opisyal. Taong 1960 nang ipinatayo ang isang pampublikong paaralang pang-elementaya sa pangangasiwa ng pamahalaan.[5] Sa loob ng tatlong sunod-sunod na taon (1998-2000), kinilala ang Brgy. Bilogo bilang "pinakamalinis at pinakamalusog na barangay sa Lungsod ng Batangas" at maging sa buong Calabarzon; nangyari ito sa buong panunungkulan ni Angel Umali.[7] Pagkatapos ni Umali, sunod namang nahalal na kapitan ng barangay si Alfredo Villanueva.[8] Noong kanyang panunungkulan, may isinagawang pagpapabuti sa patubig at itinayo ang pasilidad sa pagrekober ng materyales upang panatilihin ang wastong pagbubukod ng mga basura.[9] Noong 2007, hinalinhinan si Villanueva ni Ramil Manalo.[10] Sinundan siya ni Jaime Villena na nanungkulan nang tatlong termino matapos magwagi sa mga halalang pambarangay ng 2010, 2013, at 2018.[2] Sa kasalukuyan, si Zyril B. Manalo ang nanunungkulang kapitan ng barangay matapos magwagi sa pinakahuling halalan noong 2023.

Heograpiya baguhin

Matatagpuan ang Brgy. Bilogo sa hilaga ng Brgy. Talumpok Silangan; sa kanluran ng Brgy. San Jose Sico; sa silangan ng Brgy. Paharang Silangan; at sa timog ng Brgy. Maapas. Sagana sa pamayanan ang mga gubat, sapa, mababang burol, punong namumunga ng prutas, at pananim. Ang mga kabahayan at pook pangkalakalan ay kadalasang matatagpuan sa kahabaan ng mga pangunahin at di-pangunahing kalsada. [11]

Imprastruktura at utilidad baguhin

Meralco ang naglalaan ng kuryente sa Brgy. Bilogo samantalang ang komunikasyong pantelepono at ang koneksyon sa Internet ay iginagarantiya ng Globe Telecom at PLDT.[12][13] Sa kabilang banda, ang suplay ng tubig ay pinangangasiwaan naman ng lokal na patubig at programang pangkalinisan.[14]

Bukod sa lumalaking ani ng mga pananim at paghahayupan, may ilan na ring umuusbong na establisimyentong pang-industriya sa pamayanan, tulad ng Ortemer General Merchandise at Unija Hija Enterprises. Kaugnay nito, noong Marso 2010 ay kinilala ng UP Planning and Development Research Foundation, Inc. ang Brgy. Bilogo bilang isa sa siyam na "lumalagong pasilyo" o growth corridor ng Lungsod ng Batangas.[15]

Galeriya baguhin

Sanggunian baguhin

  1. "REGION IV-A (CALABARZON), BATANGAS, BATANGAS CITY (Capital), Bilogo". Kagawaran ng Interyor at Pamahalaang Lokal. Inarkibo mula sa ang orihinal noong 2 Agosto 2021. Nakuha noong 3 Agosto 2021.
  2. 2.0 2.1 2.2 2.3 "Barangay Bilogo". Pamahalaang Lokal ng Lungsod ng Batangas. 14 Mayo 2015. Nakuha noong 3 Agosto 2021.
  3. Cantos, Jesus Romelson "JR" (3 Agosto 2012). "Batangas City, Batangas List of Barangays". WOW Batangas. Nakuha noong 3 Agosto 2021.
  4. Official Pupils Publication of Bilogo Elementary School (2005). "Bilogo". BES Herald. Bol. 15, blg. 1. Lungsod ng Batangas, Pilipinas. p. 11.
  5. 5.0 5.1 5.2 "Bilogo Barrio School". Lungsod ng Batangas, Pilipinas: Pampublikong Aklatan at Sentro ng Impormasyon ng Lungsod ng Batangas: 14, 15, 36. {{cite journal}}: Cite journal requires |journal= (tulong)
  6. Parine na't Magsaya sa Lungsod ng Batangas [polyeto]. Lungsod ng Batangas, Pilipinas: Opisina ng Pamumuhunan & Turismong Panlungsod. 2006.
  7. Official Pupils Publication of Bilogo Elementary School (1998). "Barangay Bilogo: The Most Cleanest and Healthiest Barangay in Region 4". BES Herald. Bol. 8, blg. 1. Lungsod ng Batangas, Pilipinas. p. 1.
  8. "Association of Barangay Councils". Batangas City Profile. Lungsod ng Batangas, Pilipinas: Pamahalaang Lokal ng Lungsod ng Batangas. 1999. p. 13.
  9. Official Pupils Publication of Bilogo Elementary School (2006). "MRF rises at Barangay Bilogo". BES Herald. Bol. 16, blg. 1. Lungsod ng Batangas, Pilipinas. p. 1.
  10. Official Pupils Publication of Bilogo Elementary School (2006). "Barangay Bilogo boast new waterworks". BES Herald. Bol. 16, blg. 1. Lungsod ng Batangas, Pilipinas. p. 1.
  11. "Batangas City Map" (Mapa). Local Government of Batangas City. 20 Oktubre 2014. Nakuha noong 3 Agosto 2021.
  12. "Infrastructure & Utilities". Pamahalaang Lokal ng Lungsod ng Batangas. 20 Oktubre 2014. Nakuha noong 3 Agosto 2021.
  13. "Communication & Mass Media". Pamahalaang Lokal ng Lungsod ng Batangas. 20 Oktubre 2014. Nakuha noong 3 Agosto 2021.
  14. "Physical & Geographical Aspects". Pamahalaang Lokal ng Lungsod ng Batangas. 20 Oktubre 2014. Nakuha noong 3 Agosto 2021.
  15. UP Planning and Development Research Foundation, Inc. (2010). "Comprehensive Land Use for Batangas City (2009-2018)". Approved Batangas City 10-Year Comprehensive Development Plan, and Land Use for 2009-2018. Lungsod ng Quezon, Pilipinas. pp. 21, 23.{{cite book}}: CS1 maint: location missing publisher (link)

Panlabas na kawing baguhin