Dyesebel
Dyesebel (pagbigkas sa Tagalog: [dʒɛˈsebɛl]) ay isang karakter sa komiks mula sa Pilipinas na halaw sa sirena ng mitolohiya. Unang nilikha ang karakter ni Mars Ravelo at ginuhit ni Elpidio Torres. Nagawa din ang Dyesebel bilang karakter sa pelikulang Pilipino at gayun din sa telebisyon.[1] Baha-bahagi itong nilathala sa Pilipino Komiks noong 1952 hanggang 1953, at naisapelikula sa parehong taon na ito'y natapos sa komiks. Ginawa ang pelikula sa ilalim ng Manuel Vistan Productions, Inc. at nilabas sa pamamagitan ng Premiere Productions. Dinirihe ito ni Gerardo "Gerry" De Leon.[2][3]
| Dyesebel | |
|---|---|
 Isang pagsasalarawan ni Dyesebel. | |
| Impormasyon ng paglalathala | |
| Tagapaglathala | Pilipino Komiks |
| Unang paglabas | Pilipino Komiks #1 (1952) |
| Tagapaglikha | Mars Ravelo |
| Impormasyon sa loob ng kwento | |
| Espesye | Sirena |
| Kasaping pangkat | Darna |
| Kakampi | Fredo |
| Kakayahan | Nabubuhay sa ilalim ng dagat. |
Lumabas din ang Dyesebel sa Kampeon Komiks noong 1975. Iba't ibang mga pelikula at palabas telebisyon ang nagawa patungkol kay Dyesebel. Ilan lamang sa mga gumanap bilang Dyesebel sa pelikula ay sina Eva Montes, Edna Luna (1953), Vilma Santos (1973), Alma Moreno (1978), Alice Dixson (1990), at Charlene Gonzales (1996). Sa telebisyon, ginampanan naman ito nina Marian Rivera (2008) at Anne Curtis (2014).